Ehrenpräsi

1. I bi zwor skeptisch gsi, aber Worscht-Chääs-Salot mit Pommes isch e feini Sach. Er wäred denn no froh um so es feins Esse, wenns am Fasnachtszischtig im Altersheim Pilzpizza git… (I hasse Pilz)

2. Wenn Bäretätzli amel gad noch üs spieled, hät mer immer s gfühl me ghört sich selber nomol… eifach achli weniger guet…

3. Wenn mer z Mogelsberg cha i d Halle ine laufe ohni grossi Druckete, denn frogsch di wo alli die Lüüt sind wo söss amel gsi sind. Deför händs jetzt au döt obe gmerkt dass Wertbön en Seich sind.

4. Wenn am Morge us em Ochse gworfe wersch und gad hunger häsch, cha mer immer zom Roli i Bachstube, döt gits sicher en Kafi und es Gipfeli.

5. Wenn mer zwöschedine mol es Cola trinkt und debi e Pizza isst, cha eim da de Samstig Obig rette.

6. Z Gams händ Zueschauer bis zo de letschte Gugge müese warte bis händ chöne «Zugabe» rüefe. Wenn denn du gad uf de Bühni stohsch, chas si, dass der gad d Hose verropft - Höde wie Muni – Schwänz wie Rösser!!!

7. Z Gähwil händs d Hirsche i so chline Becherli serviert, do bruchsch e Aleitig zom trinke. Söss chas si dass alles uf em T-Shirt häsch und nöd im Muul und jo, Grüeabfuerchöbel ghöred nöd an en Maskeball.

8. So e Hoselöftig cha no ganz agnehm si am Ganterschwiler Maskeball – Geil gsi! Und wenn der sogar no en BH agworfe wert bisch gad nomol froh um die Hoselöftig.

9. Das mer so e Trophäe mues as Wägeli ane mache verstoht sich vo selber, öbs echt i d Cherche passt? - I wör meine scho.

10. Wenn am Mäntig Morge ufstohsch und der d Finger weh tüend, häsch entweder z viel Schlagzüg gspillt, oder du häsch di halb Nacht g’Löfflet im Ochse.


Dienstag, 11. Februar 2020
Clödeli

1. Wenn din Maa zmal en nüüä Namä hät "Martini-Martin" frogsch dich öb er nu spielbar seg.

2. Mit me mega Hunger z spiele isch nöd luschtig, es wird eim fascht drümmlig und ich chan definitiv usschlüsse, dass de Alkohol tschuld isch.

3. Umsomeh han ich mich über s grosse Sandwich und Pommes gfreut.

4. Z Gähwil gits sogar Bschorle zum Trinke, äntli mal öbbis gschids zum Ahstosse.

5. Z' Ganterschwil häts au das Johr wieder chogä vill Lüt gha, so spillt mer au mitme Schrumpfkopf no gern z'Nacht am eis.

6. Ä Polizistin als Mitfahrerin debi z ha, isch chogä praktisch, muäsch der amel sicher kei Sorge machä, dass en Parkplatz findsch, "momoll do chasch scho parkiere..."

7. Wenn uf Gams nochefahrsch und dini Gugge-Gspänli suechsch, laufsch gschieder nöd zerst d Stross zum Monsterplatz ufe, chasch au grad direkt im Restaurant bide Chrüzig ine go.

8. Wenn de Adi mal en nüüe Job suecht, er würd sich guät als Grüenabfuehr-Maa machä, so schnäll wie er, verstellt niemert ä Grüentonne.

9. Nöd all Uftritt debii zsii, git nöd s glich Fasnachtsfeeliing wie suscht - ja numä - Ziiht mit em Töchterli isch au goldwert.

10. S Nächstjohr gits en Vorverkauf für d Sitzplätz ide Chile - wenns so wiiter got mit Bsuecher am Narregottesdienst, müänds d Chille bald vergrössere. 


Montag, 10. Februar 2020
Kapellmeister

1. Wennd z'Ganterschwil dä Titi Lalala bim Spiele so richtig gspürsch, dass dir dä Zug vo dä Posune verspickt, ischs wohrschindlich en guete Uftritt gsi.

2. Wer meint, dass en Hennevogel esse vor em spiele nöd optimal isch, häts no nie mit Chnoblibrot probiert! Immerhin chasch so aber im Car alli a dim Problem teilneh loh.

3. Mit ere Grüeabfuhr-Tonne loht sich ganz passabel Pauke spiele. Ussert me hät d'Rechnig ohni Adi gmacht, denn isch sie zmol weg. Herrgott han ich müesse lache!

4. Alles wa guet und recht isch: Aber alli wo behauptet das Wurst-Chäs-Salot und Pommes-Frites ä gueti Kombination isch, ghöret is Gfängnis!

5. Über d'Grundmelodie vo Petra Sturzenegger loht sich ganz guet es eiges Liedli über d Wiler Bäretatze legge. Phuu, wenn i so wiiter mache han i irgendwenn gar kei Fründe meh.

6. Wie seit mer amne Boomerang wo nüme zruck chunnt? Stock. Wie seit mer amne Schränzer wo nüme zruck chunnt? Hinti. Dem Spender sei ein Trulalaa...

7. Wennd z'Gams vor luuter filmende Handys s'Publikum nüme gsehsch, isch vermuetlich wieder mol ä geili Gugge am spiele. Ah wart, das sind jo mir gsi.

8. Mittlerwiele chan ich mir mit mim geniale Trompetespiel sogar d'Spezli i dä Gruft finanziere. Schad isch nur, dass alli wo öppis in Huet werfet säged "aber däfür hörsch jetzt bitte uf".

9. Wo mir no chlii gsi sind, häts am Liechtesteiger Umzug vor em Ochse immer no es Schnäppsli geh. Die guete Ziite sind anschienend verbii.

10. Zum Glück muess i nur ei mol im Johr am Sunntig morge usewürge zum i d'Kirche z'goh. Chli musige, chli singe und es Bierli däzue machts aber au das Johr zumne freudige Alass. Entüschend isch nume gsi, dass es das Johr kein chline Steiger ab em Bänkli gfizt hät.


Montag, 10. Februar 2020
Ehrenpräsi
  1. Wenn mer am Fritig Nomittag z vierte goht go e Boxe installiere in Ochse, chas si, dass gad no schnell e rundi muesch Nagle mit em Wirt – wenigstens muesch kei angst ha dass zom zahle chunsch, de Hinti isch debi gsi.
  2. Gästebetreuig wo zwei ehemolige Gugger isch en strenge Job, es cha sogar si dass di gad voll wägtätscht.

  3.  

    Uf minnere persönliche Liste vo de schlimmste Uftritt, chunnt dä vom Fritig Obig definitiv uf de zweit Platz. Nur dä in Adelberg «Er spieled so Scheisse» isch no schlimmer gsi.

  4.  

    Wenn der am Samstig vo allne site verzellt wert, was am Fritig alles gmacht häsch, oder äbä au nöd, chasch öppä mol lache. Es macht di aber au achli nochdenklich…

  5.  

    Notiz a mich: Trink doch mol es Mineral. DANKE!

  6.  

    Die Hennevogeli wäred nu halb so guet ohni d Chnoblissauce vo de Manu… Danke! Dezue flutschts au besser abe und de Vogel hanget nöd Quer im Mage ine… nur so als Tipp!

  7.  

    Wenn mit einere redsch vonnere andere Gugge und si uf d Frog, was si spillt? Seit, si sig Fähnrich, muesch di recht zämänäh dass nöd luut lachsch – i has trotzdem gmacht…

  8.  

    Wenn z Wil am spiele bisch, und di vorderscht Zuehörer-Reihe us luuter ehemolige Schränzer bestoht, frogsch di scho, wieso die überhaupt ufghört händ – die sind jo glich all a de Fasnacht.

  9.  

    De Silvan Egon Steiger hät sich scho recht am neue Register apasst. Er verpasst isätz, verpasst de Car - wie chunnt denn da no use wenn er z Schönegrund no es paar Kollege findt zum Zaure!

  10.  

    Wenn am Sonntig Nomittag noch em gfühlt zähte Bier de Hotelier afangt Staubsuuge, isch glaub Ziit zom hei go.

 

Bis am Fritig in alter Frische


Mittwoch, 05. Februar 2020
Mela

1. Wenn am Fasnachtsstart bis nochem Uftritt met em Bier wartisch, gnüssesch de erst Schlock deför umso meh. 

2. En herzliche Dank dene wo am Fritig ufgrumt hend oder hend wöllä aber s eifach nömä hend chönnä. De Willä wär jo do gsii. 

3. Brucht no öber ä Flyerli vo de Mosligerfasnacht? I het sös no öppä en Förige. 

4. Achtung wichtig! De Silvio wör ab sofort emel gern d WC putze.

5. Wenn z Nacht id WG chunnsch und nöd secher bisch öb etz 3 Sportholzfäller oder 3 Bsoffni i de Wohnig sind. 

6. Chömmer da met de Chäshörnli und em Cordon Bleu ab jetz jedes Johr machä?

7. S'Poulet isch glab öbbe no neberem quer im Magä glege oder spöter den ebbe au nömä. 

8. Anschiinend gits öbbe emol no schweri Chöpf bim Spaghetti esse.

9. *verwachet*..."und eh verdammti Sauerei isch, dass du am 11i d Gugge gwechslet hesch!" ... *schloft witer*

10. Guet het de Adi no en Fürwehrhelm gfundä zom de Dorst löschä.

 

Amerkig zu Punkt 6: Mer chönns au gern of de Obig verschiebä. 


Dienstag, 04. Februar 2020
 
Powered by Phoca Guestbook

Eingabeformular