Ehrenpräsi
  • Wenn mer bim Apero im Gallsche gad cha abschliche bevor di alt Bere serviert wert, chunnt mer glich no öppis vom Obig mit über. – Danke Casti und Remo!
  • Wenn am Städtli-Monster gfühlti zäh Minute häsch vo de Stäge bis zo de Bar ane, denn häts mega viel Lüüt.
  • Päddy bisch nöd elei, i bi au vor de verschlossne Bauamt-Töör gstande, ha aber bis jetzt nöd wölle dröber rede, isch scho eher chli peinlich. Vor allem wenn der denn fremdi Gugger müend erchläre wo das s Essenslokal isch.
  • Wenn’t in Sirnach a de Bar stohsch und denn ame Guggergspändli chasch erkläre wo de nöchst Bankomat isch, törfsch immer demit rechne dass es nocher e rundi Hirsche git.
  • Wenn mer fasch achli iversüchtig wert uf de Tisch näbedra wos en mega Turm baue händ mit Hirsche, isch es halb so schlimm wenn mer nocher erfahrt dass es di eigne Lüüt gsi sind. Denn cha mer die beide Türm guet au gad mitenand vereinige.
  • Di säbe zwei Porschte wo z Lütisburg Konfetti is Pissoir ine gstopft händ, mached das wohl nüme gad so schnell wieder…
  • S einzig guet am Calanda Bier isch, dass es 0.58 Fläsche sind. S Problem isch, du häsch denn eifach achli länger z Bisse dra.
  • Komisch, am Usseuftritt in Schänis sind üsi Bäss plötzlich mol zämä gsi. S ganzi hät sich denn aber ufglöst won i gseh han, dass nur eine do isch.
  • Wenn mer sich z Muolen nöd so guet uskennt wärs no guet wenn mer dene Lüüt wo üs zuewinket nöd eifach zruckwinkt, sondern wör glaube, dass sich s Fescht döt befindet.
  • Wenn mer nur no so Uftritt hett wie z Muolen, denn chönt mer glaub ewig Guggemusig mache. Alles grooooosi Fasnächtler!
  • De Mäh hät die Fasnacht meh mit anderne Gugge mitgspillt als mit üs. S Triangelsolo mol usgnoh.
  • De Wiiswii noch em Niederhelfenschwiler Maskeball isch legendär, guet isch er aber immer no nöd.
  • Mit zwei Pauke, eme Drüertom und ere Chuchi cha mer guet en Umzug afange, langsam aber sicher sind denn alli Schööfli itrudlet, z letscht denn au no de Kapellmeister.
  • D Umzugsstrecki in Sangallä isch öppä glich schmal wie die in Krinau, de underschied isch, dass am eine Ort mega viel Lüüt hät, am andere Ort sind d Strosse eifach nöd breiter.
  • Wenn de Stägi z Moslig i de Bar am Bode liit und komischi Bewegige macht, weisch nöd, öb er Breakdance macht, oder er gad parad wär. (Er wör gad wenn er chönt – Er chönt gad wenn er wör)
  • Mit em Car in Krinau ifahre isch immer wieder e tolli Sach, wenn aber usstigsch und de Pneu es Loch hät, häsch grosses Mitleid mit em Bruno.
  • Wenn de Mäh nöd mitspillt und Patricia im Publikum isch, jubled wenigstens zwei im Sprengerstollä.
  • Wenn de Päddy i de Bärehöli immer über em Wägeli drüber spillt, bisch froh wenn de Posunezug vo em nöd troffe häsch. Am Stägi isch da nämli passiert.
  • Eimol meh e tolli Fasnacht gsi, danke allne wo dezue bitreit händ.

 


Montag, 19. Februar 2018
Cöni

So, doh auno minni letschte 10 Erkenntnis zu de Fasnacht 2018:

 

1. Kalberhalle isch schön gmacht. Fehle tuet nurno 1 Putzmaschine, 8 Gummidichtige für d’Stägelampene und e schlaui Musigalag.

2. Wenn de Paddy meint, er leitet de Gsamtchor in Sirnach heisst das: „Cöni fang ah!“. Guet hanni mir de erst Ton gmerkt.

3. Annere Kinderfasnacht söttmor sich nie miteme Kind ahlegge! Ussert me hät gern überall Konfetti.

4. De Paddy hät gmeint, wenni nomol es Johr wür mache, chönnti nebet ihm spiele. Doh sägi nu NEI DANKE! Eine vo üs würs nöd überlege. Lustig ischs gsi!

5. Wenns am Sommernachtsfest kein Krane mitere Discokugle hät, binni entüscht.

6. Es git wenig Ort, wott nocheme Umzug gern es Päärli Wienerli hetsch. St. Galle isch so eine.

7. Wennt bim Knoblere muesch ufgäh, und dich komischerwies niemert uslacht, sondern alli froh sind. Denn isch de Seich glaub würkli überekeit gsi.

8. D’Schnitzelbänklerinne bi de Rüth händ en super Job gmacht. Aber e Stund isch eifach öppe 50 Minute z’Lang.

9. Wellnesse tuet nöd allne glich guet.

10. Mit Fieber spiele bringt scho nöd viel. Aber wemmor bi de wenige guete Moment auno plaare mues, denn nütztmor eigentli nüt. Schön ischs irgendwie aber glich gsi.

 

Danke au nomol Allne für die viele glatte Gedächtnislückene ide letschte Johr. Ich züch mich jetzt mol i di kreativ Gugge-Pause zrugg. :-)


Montag, 19. Februar 2018
Clödeli

1. Am Städtlimonster fahre got guet sitt die chlii Sister nöme cha go hälfe cho... nur frogsch dich am Friitig wohär das Chopfweh und dringlichkeit ufs WC go, chunt. Hetsch also locker chöne trinke, wärsch glichwiit.

2. Wänn de Örgeli-live Musig z Unteregge seisch sie söllet spille bis mir uf de Car müend, sinds zimli froh wenn churz vorem halbi 3 äntli hörsch tanze.

3. Für de nüü/alt Tourplaner, oder wie au immer das jetzt isch, ich würd gern z Unteregge mal chli länger bliibe. Sie hend die best Kafistube.

4. Im Apero vorem Schännerumzug lohnt sich alleweil, danke liebi Oberstiftin.

5. Yess, Gänger-Töffelifahre chani immer nu.

6. Choge vill Lüüt stönd am Strosserand z St.Galle am Umzug - chan dene aber bitte mal öbbert sägä, dass Gugger nöd Freud hend wenns Konfetti direkt an Grind überchömet?!

7. Wenn als Gugger de Punkt 6 de Lüüt wetsch erklärä und du seisch, hegsch än Konfettialergie, chemsch en grüene Grind über, nehmets ein eher nöd so ernst.

8. Sone Rösti am Fasnachtssunntig bide Rüth isch de Hammer.

9. Es git Moment im Läbä woder es rieeeeessse Loch neb dir wünschisch, zum driii versinke - keis schöns Gfühl wenn en z grosse Schnorri bisch.

10. Wenn de Bölle under de Nase durelauft, chasch nüt defür das am letschte Uftritt ase Träne vergüssisch.

Schön isches gsi - schön isches verbii:-)

 


Donnerstag, 15. Februar 2018
Kapellmeister

1. S'letzte mol Erkentniss als Kapellmeister schribe, loht wiedererwarte doch es bitzli Wehmuet ufcho.
2. Wenn am Schluss vo dä Fasnacht dä halb Verein am Träne vergüsse isch, frogsch di scho, wieso das die Lüt überhaupt ufhöred. Jänu, so händ mir imene Johr sicher wieder en huufe gueti Hamburger!
3. Trotz dä Sammelaktion und dä Car-Verlängerig bim Bruno, chunnt irgendwenn dä Ziitpunkt wo mer us em fahrende Huus wieder muess uszieh. Schad hät s'Geld nöd glanget, das mir alles bis nöchst Fasnacht chönd im Car loh.
4. Wemmer sich z'St. Galle am Umzug mit dä Startziit verschätzt, chas passiere das eim die eige Gugge spielend entgege chunnt. Frei noch A. Hinterberger: Huere schlimm weg eimol.
5. Bewerbige für ä Gugge-Fründin nimm ich absofort entgege. Jetzt wo d'Janine nüme däbii isch sött ich öpper neus ha, wo so guet uf mich lueget. Und immer fahrt.
6. Im Remy chli go Jasse isch ä glungni abwechslig. Wennd aber d'Ohrestöpsel muesch inetue, wills so en verdammte Lärm isch, wirds mit dä Kommunikation chli schwieriger. Guet sind mir alli dä Zeichesproch mächtig!
7. Am freie Mäntig miteme glatte Grüppli ane Bade-Taste-Party goh isch ziemlich lustig. Blöd nur, wenn dä einzig bisch wo sich a dere Party verkleidet hät.
8. Das es ä strengs Fasnachtswuchenend isch, merksch spötestens denn, wenn dä Ochse jedes mol scho zue hät wennd no uf es Fiirobigbier willsch.3
9. D'Hirachie i üsem Verein muess glaub wieder hergstellt werde. Mittlerwiele sind scho d'Hamburger im Car am liirä.
10. Erstunlich, was binnere Gruft-Putz-Aktion so alles für Müll füre chunnt. Uf jedefall händ mir jetzt kei Stempel-Maschine meh.
11. Wenn dich am Monster dini zwei "Fröschli-Wiiber" im Stich lönd, muesch dich halt selber um Nochschuub kümmere.
12. Wennd am Monster willsch go z'Nacht esse und völlig verdutzt a dä gschlossen Bauamttür rüttlisch, merksch selber das öppis nüme glich isch wie früehner.
13. Bi so Wetter wie am Zistig lauft mer doch gern dä ganz Umzug z'Krinau. En musikalische Leckerbisse isch es aber trotzdem nöd grad gsi.
14. Wenn dä Hinti zmol mit rosarote Leggins näbed dir im Car hocked, luegsch chli gnäuer ane wo das er sini Händ hät. Bitzli Angst häts mir scho gmacht.
15. Wenn z'Sirnach s'Drehliecht afangt und dä Chapeua eifach dä Huet drüber stülp, chasch guet nomol eis, zwei spiele.
16. Notiz a mich: s'Vogelisi chammer oktaviere, sött mer aber nöd. Gell Roger?
17. Nebed em Cöni huupe macht verdammt viel Spass. Wenns aber no es Stückli meh gsi wär, hetts eine vo üs zwei vermuetlich gnoh. Vorher hett keine ghört spiele.
18. Nei Pocahontas, es tuet mir nöd leid. Du bisch ä elendi Nervesäge!
19. Z'Unteregge sägeds dem Wienerli. In Worheit isch es aber nur en Darm wo mit chli warmem Wasser gfüllt gsi isch.
20. Wenn z'Niederhelfeschwil en Thurvogel vor dir uf em WC-verschwindet, wunderisch di es bitzli wieso das er nöd es freis Pissoir ninnt. Churz druffabe han ich denn ghört, wieso das er sich für ä Kabine entschiede hett. Guet, wenn ich so en rüsel müesst spiele, wür i mi glaub au für d'Kabine etnscheide.

Viele Dank eu allne eimol meh für ä strengi, geili und musikalisch sehr erfolgrichi Saison!
Es hät unglaublich viel Spass gmacht mit eu - Danke eu allne für dä Isatz und die hammer Fasnacht!

Allne ustretende vielen Dank für euen Isatz und alles gueti! Bitzli Tröttel sind ihr trotzdem... :-)

Erholet eu guet!

Auf die Dauer - Schätzli-Schränzer Power!


Donnerstag, 15. Februar 2018
Regu

Liebi Schränzer ich wött nöd eifach 10 Erkänntnis schriibe, ich wett eu aber 41 mol vo ganzem Herzä dankä säge:

 

Dankä Adi, dass du mir gholfä hesch, mich uf mine Trömmeli zrächt zfinde - au wenni ab und zue dri, denäbe oder chrumm druf ghaue ha!

 

Dankä Angi dasi ha dörfä mit dir brüelä! Bisch en wunderbare Mänsch! 

 

Dankä Anita für die schönä, fantasievolle und abwächsligsriiche  Guggegwändli!

 

Dankä Bettina B. für die schöni Hamburgerzyt wo mir zäme gha händ!   

 

Dankä Bettina L. für di gmeinsame Autofahrte und gute Gspröch mit dir!  

 

Dankä Chapeau für d Erkänntnis, dass nöd di jüngschtä Schränzer am längschte i de Beizä höckled!   

 

Dankä Clödeli für die immer liebe Chärtli zum Geburtstag mit de Geburtstagswünsch!

 

Dankä Cöni für alles! Öb FCB-Spässli, Geburtstagsparty crashe  oder abentürlichi Schlittefahrtä,  du hesch d Fasnacht für mich eifach schöner gmacht!

 

Dankä Corina für d Plättli im Car und notürli s Bier, s Eve und d Mineräli! 

 

Dankä Dani für dini treui und hilfsbereiti Art! Me cha sich eifach uf dich verloh! 

 

Dankä Desi für dini immer gueti Luunä! Vor, während, noch de Gugge - eifach immer! 

 

Dankä Fabi für dis Posunäsolo bim FF, s wär eifach nöd s gliiche ohni dich!   

 

Dankä Fabian fürs probiere biibringä vom “Seel ächli lo bambele loh“ Text! I cha en zwar nonig ganz, schaffs aber irgendwenn scho no! ;-)  

 

Dankä Gispel für die luutä und dütlichä bäh bäh bäh bim Schnägg! I werd da au in Zuekunft am Radio so mitsingä!

 

Dankte Hinti fürs sii wied bisch! En riisä Trottel wo zu de beschtä Hamburgertruppe ghört hed - obwohl du eis oder zwei Mööli verschloffä hesch… ;-)  

 

Dankä Janine für dini viele viele Stunde wo du für de Verein investiert hesch, immer glueget dass üsi Zahle stimmed! Alles Gueti für d Zuekunft! :-)  

 

Dankä Käthere, dur dich hani mi immer vor em Hugo spiele chönnä drucke. So schlächt wie du d 7ner Reihä chasch, han ich kain Plan vo links und rechts! :-*    

 

Dankä Kevin für dis super Hamburgerjohr! S Eve und s Mineral isch immer pünktlich cho! 

 

Dankä Leni für die guti Guggezyt! Ohni dich hätti z Aros a de Sternäbar nie es Teebüütelshöttli gno!

 

Dankä Lisä für eifach alles! Du bisch mis allerberschte Lieblings-Regischtergspändli ever! Immer do für mich, hesch mi i schwache Stunde (zum Biispil z Moslig) immer useglupft. Bisch eifach de Hammer!  

 

Dankä Lösi für s Erlebnis, dass sich au Mänschehöörli wie Schofwullä chönd aafüühlä!

 

Dankä Mäh für dini Gaschtgeberqualitäte! Du bisch mit Abstand de einzigartigschti, wörldbeschti, humorvollsti und au chli dümmschti Gaschtgeber! Wennt Bewertige für dini Höhli bruchsch, gib mir Bscheid, vo mir gids 5 Sternä! 

 

Dankä Mäsi E. für zäme eis näh! Öb i de Chalberhallä oder uf de Guggereis - s isch immer luschtig!  

 

Dankä Mäsi K. für alle wichtige, unnützä, tüüfgründige und oberflächliche Gspröch! ;-) 

 

Dankä Mäthi für d Nussstängeli im Car - die händ mi useglupft! Und gell, dänksch as Bier wot em Dani muesch zahlä! ;-)  

 

Dankä Matze für s Erläbnis, zum fascht ime Lift stecke z bliibe - mit somä altä Lift wötti nie meh fahrä! :-)     

 

Dankä Melanie für de scho fascht legendäri Spruch: „Mach mol so…“ !  

 

Dankä Päddy für dini strukturierte, organisierte, konsequentä und lustige Guggeprobe! Du hesch de Sauhuuffä immer im Griff gha und üs fürschi brocht. Da isch ganz grosses Kino gsi!!!

Päddy, Päddy, Paddy!!!… 

 

Dankä Pinsel für dini verruckti Art, du bisch eifach es dureknallts Huehn!   

 

Dankä Ramona für alli Strofä vo „Es tut mir Leid Pocahontas“ - meh mueni glaub nöd säge! :-*

 

Dankä Regi für dä eeeedli Tropfe vo Whisky im Car! ;-)

 

Dankä Remo für die Förmli wo du mir ab und zur verpasst hesch - mängisch ohne dasis gmerkt ha!  

 

Dankä Roger für d Hilf bim Hugo und Wendli - bi ab und zue froh gsi um dich!  

 

Dankä Silvi für die exakti Fotidokumentation (chönd hälfä bim rekonstruiere vo Lugge) uns s Lösä vo minä Fasnachtschnötä i mim Ruggä! 

 

Dankä Silvian für die luschtigä und mängisch verpeiltä Gspröch a allnä mögliche Barä i de letschtä füf Johr! 

 

Dankä Simon für s erklähre vom Hackbrätt! Himmel da Ding hed pro Ton füf Saite und zug vo drüü Tonnä! Bi ächt beiidruckt und jo - priis! ;-)     

 

Dankä Stägi für s schönä zweistimmige singä! Ha schon immer gwüsst, dasis nöd cha, aber mit dir heds immer Spass gmacht!   

 

Dankä Stef für die viiiiilä, viiiiilä Nastüechli (und ab und zue de Guggegwändliärmel)! Und notürli fürs luege, dass ich uf mim Schlitte immer is Tal cho bi!  

 

Dankä Tabea für dis Füdlischwänkä, do merkt me ez nie wennt bim Trompetäfigger us em Takt gheisch! :-)  

 

Dankä Urs für die schönä Stunde wo mir „Spiel und Spass mit U R S“ gha händ  mit dir als Obergugger, im Tiiischer oder i de Schränzer-Bänd!

 

Dankä Yves für dini Uusrutscher bim Schminkä mit de Luft a minä Ohrä, ha immer müessä lachä!

 

 

Ich wird eu vermissä! Dankä für die hammergeili Zyt!  

 

Regu


Mittwoch, 14. Februar 2018
 
Powered by Phoca Guestbook

Eingabeformular